في ليلة الخميس 12 نوفمبر، وفجأة ومن غير أي مقدمات، توقف Outlook عن العمل عند ملايين المستخدمين حول العالم، ومعاه خدمات Microsoft 365 اللي بتعتمد عليها شركات ومدارس ومؤسسات حكومية كاملة، عشرات الآلاف بدأوا يشتكوا في نفس اللحظة إنهم مش قادرين يدخلوا على إيميلاتهم ولا يبعتوا ولا يستقبلوا أي رسائل، والشغل كله اتعطل، اجتماعات اتلغت، ومراسلات مهمة اتأجلت، وخدمات عامة في بعض الدول زي نيوزيلندا اتأثرت بشكل مباشر، منها أنظمة السفارات والقنصليات وخدمات الهجرة.
واستمر العطل لحد صباح الجمعة 13 نوفمبر من غير حل نهائي، ومايكروسوفت أعلنت إنها شغالة على إصلاح المشكلة وبتحقق في سببها، لكن لحد دلوقتي مفيش موعد مؤكد لعودة الخدمة بشكل كامل،
واللي حصل ده رجّع للأذهان سؤال مهم جداً: هل العالم بقى معتمد بشكل خطر على شركة واحدة؟ وهل إيميل واحد لما يقع يقدر يوقف شغل دول كاملة؟ ناس كتير شافت إن اللي حصل مش مجرد عطل تقني، لكنه جرس إنذار بيأكد إن أي خلل بسيط في البنية التحتية الرقمية ممكن يتحول في دقائق لأزمة عالمية، وإن الشركات والحكومات لازم يكون عندها بدائل جاهزة قبل ما تتفاجئ مرة تانية،
وانت بقى.. هل الإيميل عندك اتأثر بالعطل؟ ولا شغلك مشي عادي؟ اكتب لنا في التعليقات حصل معاك إيه، وشير البوست عشان غيرك يعرف اللي بيحصل.
صوت الشعب
