احنا مش عايزين سنة جديدة بتلمع، ولا تقويم متعلق على الحيطة لسه ورقه أبيض.
احنا عايزين سنة مستعملة.. من بتاعة زمان.
من اللي كانت عند ستي وستك.
سنة كان فيها البركة في رغيف العيش، واللمة على الطبلية تساوي الدنيا كلها.
سنة كان فيها الجار قبل الدار، والباب مفتوح، والقلب مفتوح أكتر منه.
عايزين سنة فيها نصايح ستي الحلوة اللي كانت بتتقال بحب مش بفرض:
*"متمشيش مع فلان، وخلي بالك من فلان"*
مكناش بنفهم وقتها إنها كانت بتحمينا، مش بتخنقنا.
كانت شايفة بقلبها اللي احنا مش شايفينه بعينينا.
عايزين ناس تصون العشرة والعيش والملح.
ناس لو زعلت منك، تزعل وانت لسه غالي.
ناس لو غبت، تسأل عليك.. مش تنساك.
ناس الكلمة عندها عهد، والوعد عندها دين.
زمان مكنش فيه حاجة اسمها "بلوك" و "إلغاء صداقة"..
كان فيه عتاب، وكان فيه "معلش"، وكان فيه حضن يلم كل حاجة.
كان الزعل يبات ليلة واحدة بس، والصبح نصحى نلاقي القلوب اتصالحت لوحدها.
احنا تعبنا من السنة الجديدة اللي كلها جري وسباق ومقارنات.
تعبنا من ناس بتعرفك وقت المصلحة، وتنساك وقت الشدة.
تعبنا من الضحك اللي من غير نفس، والسلام اللي من غير قلب.
هاتولنا سنة مستعملة..
فيها ريحة الفطير، وصوت الراديو الصبح، ودعوة أمي وهي بتقول "ربنا يستر طريقك".
فيها الجدعنة، والأصل الطيب، والست اللي بتخاف على بنت جيرانها زي بنتها بالظبط.
احنا مش عايزين سنة جديدة..
احنا عايزين نرجع ناس زي زمان، بقلوب زي زمان.

صوت الشعب





