مجدى صبحى يكتب: عم مختار وشركات المحمول
عم مختار راح فرع الشركة يدفع الفاتورة.. لقاها زحمة جدا والناس كلها مستاءة جدا من الباقات والحركات.. وكان قدام الموظف راجل بسيط خالص معاه تليفون قديم بزراير… بيسال يابنى انا فاتورتى باربعين جنيه وجايلى فاتورة ب ١٠٠ جنيه.. وانا مابكلمش حد خالص.. انا يا دوب أردعلى ولادى عشان يطمنوا عليا… قاله الموظف يا حاج دى اشتراكات الباقات اللي انت مشترك فيها… استغرب الراجل وقاله بكات ايه يابنى.. انا معرفش ايه البكات دى.. قاله باقة الانترنت. رد الراجل وقاله انا ماليش فى الانتركت انا بسمع عنه بس معرفش ايه ده.. الله يحظك يابنى.. طب وكل الفلوس الزيادة دى انتركت.. قاله وفى كول تون.. رد الراجل طب ومال التليفون أكل توم ولا ماكلش.. ضحك الموظف وقاله يا حاج مش توم كول تون يعنى اغنية.. رد الراجل وقاله اه كلثوم… ايوه صحيح انا كل يوم باسمع الست وانتوا عرفتوا اذاى… ودا كمان عليه فلوس. يابنى انا عاوز افهم انا بدفع كل دا ليه… قاله وكمان خدمة ستاتس.. قاله الراجل وايه الستاتس ده مانا قلت لك ايوه بسمع الست كل يوم انتوا دخلتوا ف مزاجى… عم مختار ميت على نفسه م الضحك… وقال للموظف لو سمحت الغي له الباقات واضح ان الراجل ماشتركش ف حاجة.. قاله الراجل ايوه يابنى والله.. وشكر الراجل عم مختار… ولما قعد عم مختار طلع مشترك ف نفس الباقات.. ضحك وقاله يابنى هى مقرر دراسي علينا انا ما اشتركتش.. ولما بنبعت الغاء ما بتتلغيش… ارحمونا اللى فينا مكفينا
