مجدى صبحى يكتب يوميات “عم مختار” : عم مختار والالفاظ

عم مختار متغاظ.. اتخنق من سوء الألفاظ..كلام ولادنا بقي الغاز… حتى كتابتهم بقت رموز… حروف وأرقام ولخبطة.. يسأل عم مختار… يابنى دا لاتينى.. يقوله… لا يا عمو… دا فرانكو…. يرد عم مختار ودا بتتعلموه فى المدارس؟ مدارس ايه يا عمو يا عجوز دى حاجة لزوم الميديا.. خليك لذوذ..ها… هارش؟ عم مختار.. هارش ايه يا بنى مانا كويس قدامك أهو. انت شايفنى بهرش؟! يووووه يا عمو دانت قديم قوى.. هارش يعنى فاهم… ها دايس… عم مختار فى ذهول… يا بنى مش دايس على حاجة يوووه.. دايس يعنى يعنى فاهمنى او موافق… احتار عم مختار يابنى دا فى أى قاموس؟ دايس وهارش يعنى فاهم… ماشاء الله دى لغة ليها مفردات ومرادفات كمان…. هههههههه… فكك يا عمو.. أفكنى يابنى بس قرفتنى..

شوهتوا كل حاجة حلوة وتقولى لزوم الميديا.. دى كوميديا.. كتابة زى الشخبطة… واغانى كلماتها ملخبطة.. دخلتونا فى متاهات .. وتقولوا أغانى مهرجانات… واللى يغنوها أرجوزات.. دا احنا كنا زمان بنتعلم من الأغانى..أحلى عبارات ومعانى…. دا انا سمعت واحد بيغنى ويقول دككنى فى حبك دككنى.. وبإبرة حبك شكشكنى… دا مطريب ولا منجد… اه هو منجد وأهو كله خبط ورزع.. فوقوا بقى يابنى