مروه نايل تكتب : اتمرجح الليل في السما
اتمرجح الليل في السما
وفرد قلوعه بعتمته
وسّعت له وسبت المجال
مفتوح يبيّن قوّته
قرّبته مني سمحت له
يقاسمني خطوات رقصتي
وفي حضنه نامت قوّتي
صابني بعينيه
سلّمت له ما سألت ليه
وعملت مش شايفاه سرق
كل الورق
الأخضر النادي الرطب
من زرعتي
وسابلي الخشب..
قبل اما تكمل جولته
ويعد على اسمي الحكم
قبل اما اقوم
سرقت من عينه النجوم
أول ما حس بعملتي
منه انطلق نفخ الغضب
قام ولّع النار في الحطب
نوّر طريقي باللهب
لملم ضلامه واختفى..
والبخت جايب بعده نور
ومبدِّل الغيامات مطر
تضرب في أرضي
تزرع الحلم بخضار
يبنيلي دار
ومنوّر احلى
م اللي قنديله انطفى..
بمحبته مليان دفا
لكنه لسّه فيه سواد
من ضلمة سرقاله القمر
حتى لو الليل اعتذر
وطلعله بدل البدر شمس..
ولا ألف ألف معجزة
تقدر تخبي جرح أمس
