«بقيت مديون وهنزل أبيع تليفوني».. شريف إدريس يعلن اعتزاله الفن
أثار الفنان شريف إدريس، مفاجأة صادمة لجمهوره ومتابعيه بخبر اعتزاله الفن وأسبابه.
وكتب شريف إدريس، عبر حسابه على موقع التواصل الاجتماعي “فيس بوك:” بسم الله الرحمن الرحيم.. بعد ٣٥ سنة سعي وتعب وشقي في الوسط الفني، قررت الاعتزال والابتعاد تماما وتغيير مسار حياتي وأي حد عنده فرصة سفر ليا هاكون شاكر ليه وده طلبي الوحيد.. وده قرار أخدته بعد ما الامور وصلت في الوسط الفني لمرحلة عبثية وصلت إني بقيت بشوف بعض الزملاء بيشحتوا الشغل علني علشان يشتغلوا لأن الشغل بقي متقسم علي ناس معينة”.
وقال شريف إدريس: “فلو الامور وصلت لكده أبعد أحسن.. وحتى لما بيجي شغل بيتفرض عليك توافق بأقل الفلوس وتخرج من الشغل مديون.. ومواقف مهينة زي أن شركة انتاج تعرض عليك أجر هو قيمة ربع أجرك والسبب إن الميزانية مصروفة على الديكور.. طب خلو الديكور يمثل”.
وأوضح شريف إدريس: “هحكيلكم موقف حصل معايا من أسبوع.. اتصل بيا حد قالي عايزين حضرتك بكره عندك تصوير في مسلسل كذا بس هتدفع عشرة في المائة للكاستينج دايريكتور. .كان هيجيلي جلطة بعد ما قفلت المكالمة ووافقت علشان انا محتاج اشتغل ومحتاج فلوس. .وماقدرتش استوعب الفكرة بصراحة اني بعد العمر ده مضطر ادفع علشان اشتغل فاتصلت واعتذرت… وده الحال حاليا إن الأمور بقت في ايد كاستينج دايريكتور.. وده موقف من مواقف كتير مريت بيها لو حكيتها محتاجة كتاب مش بوست عالفيس فطالما الشغل بقي لازم يتدفعله..وطالما الشغل بقي بالشحاته..يبقي بلاش أحسن”.
وتابع شريف إدريس: “انا طول عمري راضي الحمد لله.. بس حقيقي أنا وصلت لمرحلة اكتئاب وصلتني اني بقيت بنام احلم بكابوس اني بقتل عيالي وبقتل نفسي لأني وصلت لمرحله نفسيه وماديه اني بقيت مش قادر اربيهم ولا اصرف عليهم وانا عندي تلات اطفال بعبدهم عباده متخيلين حجم المسؤولية..وبقيت مديون لطوب الارض”.
وأضاف شريف إدريس: “حقيقي لو حد عنده فرصة سفر ليا هاكون شاكر ليه جداً وهيكون جميل في رقبتي لحد ما اموت لأن حقيقي انا مش قادر اعيش في البلد دي تاني انا حاولت اسعي في اي مجال تاني بس ماقدرتش”.
واختتم شريف إدريس: “وحقيقي لو اتعرض عليا بطولات بعد البوست ده هرفضها لان البوست ده هو نهاية علاقتي بالمجال اللي اتربيت فيه ودرسته وعشت فيه كل تفاصيل حياتي والحمد لله علي كل شئ ..همسح ابلكيشن فيسبوك من تليفوني لاني هنزل ابيع تليفوني اصلا..فانا هاكون متاح اونلاين لحد بالليل..لو حد عنده فرصة شغل وسفر ليا ومش معاه رقمي ياريت يجيبه من اي حد.. ملحوظه: انا مش محتاج طبطبة من حد انا محتاج فرصة سفر وشغل تخليني أعيش أولادي وبس.. شكرا ليكم محبتي للجميع هاين عليا اقوم ارمي نفسي من البلكونة بعد ما وصلت اني اكتب البوست ده”.
