شهد الرئيس عبد الفتاح السيسي، صباح اليوم الأحد، الجلسة الافتتاحية للمؤتمر الاقتصادى لعام 2022، وخلال الجلسة الافتتاحية تحدث الرئيس السيسى عن إنجاز حقل ظهر ودوره فى دعم الدولة المصرية خلال أزمة الغاز. 

وقال الرئيس السيسي: “ترسيم الحدود فى البحر المتوسط مع قبرص واليونان.. وفى البحر الأحمر فى السعودية.. كان له دور كبير فى عمل الحقل، متابعا: “لولا ترسيم الحدود ما كنشى فيه شركات تعمل تنقيب.. ترسيم الحدود ده أول حاجة”.

وأضاف الرئيس السيسي: “عاوز أقولكم.. مش الفكرة ولا القدرة.. الفضل بتاع ربنا علينا.. لولا حقل ظهر كان زمان مصر “مطفية”.. مفيش فلوس ندفع كل سنة 2 مليار دولار شهريا من أجل تشغيل محطات الكهرباء وده بالسعر القديم.. الأسعار الحالية كنا هنحتاج 10 مليارات دولار فى الشهر بالسعر الجديد.. ادفعهم للغاز لتشغيل محطات الكهرباء وتفضل منورة.. دول منين؟!.. 120 مليار دولار فى السنة.. اجبهم منين.. ربنا سبحانه وتعالي.. بالنسبة لى كله ربنا.. بالنسبة لى انا ربنا.. لما جينا نعمل الترسيم الكل هاجمنا”.

وتابع الرئيس السيسي: “ربنا يسر الأمر.. شركة إينى بتقول 5 سنين علشان اخلص حقل ظهر.. قولت لا 18 شهر فقط.. مش 5 سنين.. أنا موجود كل يوم.. أى مشكلة هخلصها.. معمل تكرير بيحتاج سنة و3 سنين لتخصيص الأراضي.. اتخصصت فى ساعتين بالتليفون.. مش كده يا طارق”.. اتطلب يتعمل 10 آلاف خازوق لتجهيز الأراضى فى بورسعيد الخاصة بمعامل التكرير.. اتحركت معدات بالآلاف كى نجهز الخرسانة الخاصة بالمعمل اللى بنتكلم عليه لحقل ظهر”.

وأكمل الرئيس عبد الفتاح السيسي: “من فضلكم.. والدكتور مصطفى بيتكلم بيقول عنوان ولكل عنوان حكاية لينا كلنا يا مصريين.. أنا عاوز أقولكم.. اللى انتم شايفينو ده.. 25 ألف ساعة عمل بلا توقف منى ومن الدولة”.. “25 ألف ساعة عبارة عن 7 سنين.. 84 شهر.. 30 يوم.. 10 ساعات فى اليوم على الأقل.. اللى حصل بالله.. والله بالله.. والله بالله.. ولا كان يحصل أبدا”.

وفى نهاية الجلسة الافتتاحية، قال الرئيس السيسي: “عاملين نقاش مفتوح عن مصر وأحوالها.. وعاوز أتكلم من منظور المسؤولية اللى حملتوها فى رقابتي، ومشاركين معايا فيها”.