حسام الدين أشرف، هو مدرب معتمد من الجمعية المهنية للموارد البشرية بوزارة التضامن الاجتماعي في إعداد الحقائب التدريبية، ومدرب من قبل وزارة الشباب والرياضة في البرنامج القومي “سفراء ضد الفساد”. يتمتع بخبرة متميزة في العمل الشبابي وبناء الوعي المجتمعي، ويؤمن بأن التدريب الحقيقي هو ما يترك أثرًا في فكر وسلوك المتدرب.

إلى نص الحوار:

في البداية.. عرفنا بنفسك وبطبيعة دورك في البرنامج؟

أنا حسام الدين أشرف، مدرب معتمد في إعداد الحقائب التدريبية، وشاركت كمدرب في البرنامج القومي “سفراء ضد الفساد” التابع لوزارة الشباب والرياضة. خلال البرنامج، كنت مسؤول عن تقديم تدريبات ميدانية ومحتوى تفاعلي مخصص لرفع وعي الشباب بأهم القضايا المجتمعية، زي مواجهة الفساد والغش، ومكافحة الشائعات والتنمر، وغرس قيم الانتماء الوطني.

إيه اللي بيميز البرنامج ده عن غيره من المبادرات؟

اللي بيميز “سفراء ضد الفساد” إنه مش بس برنامج توعية، لكنه مبادرة شاملة بتركز على تنمية الوعي والمهارات والقيم مع بعض. المحاور الأساسية زي مكافحة الغش، مواجهة الشائعات، الحد من التنمر وتفعيل دورالمسئولية المجتمعية، بتخلي المتدرب مش بس واعي، لكن كمان قادر ينقل الوعي ده لغيره. إحنا بنقدّم تدريب واقعي، مبني على مواقف حياتية بتواجه الشباب في حياتهم اليومية وده تم بشكل كامل تحت قيادة الاستاذ الدكتور اشرف صبحي وزير الشباب والرياضة.

إيه أكتر حاجة لمستك في الشباب اللي شاركوا في البرنامج؟

أكتر حاجة شدتني فيهم هي الرغبة الصادقة في التغيير، كل مجموعة بشوفها بلاقي وعي متزايد وإصرار حقيقي إنهم يكونوا نموذج إيجابي في مجتمعهم. وده ظهر جدًا في ورش العمل والمناقشات اللي حصلت حوالين محاور زي “مواجهة الشائعات” و”التنمر الإلكتروني”، كانوا بيطرحوا حلول عملية وفعالة، وده بيأكد إن شبابنا عنده وعي ومحتاج بس المساحة يعبر بيها عن نفسه.

رسالتك الأخيرة؟

رسالتي إننا لازم نؤمن بقدرة الشباب ونحتضن طاقتهم. برنامج “سفراء ضد الفساد” نموذج ممتاز للاستثمار في وعي الشباب، ونجح في خلق جيل قادر يواجه التحديات زي الغش والتنمر والشائعات، ويكون سفير للتميز والنزاهة في مجتمعه. وأنا فخور جدًا بكوني جزء من المشروع ده، وسعيد إني قدرت أساهم ولو بجزء بسيط في بناء وعي جيل جديد.