جميل إنك تحاول…. وتجرب… وتفشل… مش غلط ولا عيب بس لازم كل مرة تتعلم من أخطائك، أقع بس قوم أقوي هي دي الحياه .

مش معنى إنك قابلت ناس وحشه تبقى كل الناس وحشه مش معنى إنك لسه ما لقتش الحب يبقى الحب مش موجود، بالعكس كل حاجه في الدنيا دي لها وقت فقط (اصبر) ، دور على صاحب دور على أخ أستغل كل حاجه حواليك لصالحك

حتى السوشيال ميديا كلنا عارفين إن كثير مننا بيقضي أغلب يومه على بيستخدم الموبايل، وعلى قد ما لها عيوب لها مميزات أنا شخصيا بفضل الله قدرت أحول عيوب السوشيال ميديا إلي مميزات.

قدرت أكون أصحاب جديدة عيلة جديده وأكسب من خلالهم خبره جديده خلقنا جو تاني خالص إسمه (عائله الفيسبوك)

في بداية ما انكرش أن ناس كتير كانت بتدخل تضايقني وهاي وممكن نتعرف وكل الحاجات اللي احنا عارفين هل دى ما انكرش إني في أول الأمر بدأت انزعج كثير وقررت أقفل الصفحه أكتر من مره بس كنت برجع وأقوي نفسي وقدرت أعمل لنفسي شخصية الناس تحبها وتحترمها وكانت النتيجه إني فعلا بقيت شخص محبوب ومشهور وناجح وكل الناس بتحبني.

الفكره ماكانتش فكره إن الفيسبوك وحش لا …. الفكره كانت إن أنا إزاى أستخدم الفيسبوك صح وأعرف أتعامل معاه خصوصا إن أنا شايفه أن الفتره دي الفيسبوك وضع معايير للمجتمع قويه جدا وكمان عمل اوبشن حمايه إنك تقدر تحمي صفحتك من اى هكر ودة من خلال ربطها برقم التليفون وكمان بتعمل لاي حد بيضايقك بلوك بمنتهى السهوله وكمان ممكن تبلغ عن اي صفحه سواء هكر وخلافه وتجيب حقك والصفحه فعلا فيسبوك بيقفلها ومن هنا بدأت اكون شاعرة غنائيه

وبجملة الكلام احب اعرفكم بيا أكتر، انا من مواليد المنصوره عام ١٩٩٢ درست في كلية الحقوق وحصلت على دبلومه ف الإقتصاد الدولي والمالية العامة وماجبستير في القانون الخاص ولكنى لم اعمل بهذا المجال.

أختارت لنفسي طريق تانى بحبه وهو كتابة الشعر الغنائي وساعدتني كتير السوشيال ميديا علي الانتشار وتسويق كلماتي.

خلاصة القول … مفيش حاجه صح 100% ومفيش حاجة غلط 100% احنا اللي نقدر نحدد مقياس الصح والغلط عن طريق كيفيه استخدامنا واستفادتنا من هذه الأشياء. أما عن علاقتي بالقلم………

فالقلم هو أهلي وأصحابي ورفيق دربي .. قلمي بالنسبالي هو دكتوري النفسي اللي اقدر اتكلم معاه كتير جدا وبمختلف المشاعر وبيقدر فعلا يعبر عنها سواء في صورة قصيدة أو أغنيه أو حتى شخبطه علي الورق مش مهم اكتب إيه الأهم إنى أكتب.