عبد الرحمن سردينة يكتب : نفسي يكون لي نصيب من اسمي

أيوة انا غلبان
أنا راضى و جدآ بقليلى
بفرح بالحاجة اما تجيلى
سيبكم من دورى التمثيلى
إن انا زعلان ..

أيوة انا غلبان
لا بجادل أصلا ولا اقاوح
أنا حاطط على قلبى مراوح
أنا بحزن و ف لحظة بسامح
دول عشرة زمان ..

إنسان غلبان
عايش ع الماضى و متعشم
يرجع بحبيب
كان صاحب و ف قلبى معلم
دلوقتى غريب
إنسان م الصعب انى اتنبأ
بعلوم الغيب
كنت افهم فعلاً من بدرى
اللمة نصيب ..

إنسان غلبان
مش طالب أكتر من سترى
ف زمان فتان
ربنا يهدينى يكيفنى
على أى مكان
و ساعتها هكون انا مستغنى
عن إنس و جان
و يكونلى نصيب انا من إسمى
عبد الرحمن ..