الرئيس السيسى: زيادة إيرادات قناة السويس بنحو 11 % عن العام الماضى
قال الرئيس عبدالفتاح السيسي، إن زيادة إيرادات قناة السويس بنحو 11 % عن العام الماضى بما يعادل 500 مليون دولار، يؤكد قدرة القناة على التعافى.
وحول منظومة التأمين الصحى الشامل، أضاف الرئيس السيسي خلال افتتاح عدد من المشروعات التنموية بسيناء: “تجربة بورسعيد تثبت أقدامها وتؤكد كفاءة النظام اللى ماشين فيه، ولما بنتكلم عن 6 محافظات عاوز أقول للمواطنين والمشاركين في العمل إن إحنا بالإجراءات الخاصة بالتوثيق أرجو إنكم تتحركوا معانا للاستفادة بالمزايا التي تقدمها المنظومة”.
وأضاف الرئيس: “قلنا إن الدولة تخلص الأمر خلال 15 سنة، فقلنا نضغط ونخلص خلال 10 سنوات ولما اتكلمنا عن حياة كريمة اتكلمنا عن الأمور الخاصة بكل وزارة، وخطط الوزارات داخل الدولة المصرية، وكنت عشمان أنهم ينزلوا بالرقم من 10 سنين ولكن لاعتبارات معينة يصعب ده، ولكن على الأقل العشر سنين يقلوا شوية، لأن العائد الصحي والإنساني اللى هيعود للناس ضخم جدا، وبالتالي كل إما هندخل أكبر حجم من المحافظات هيكون له تأثير في تحسين جودة الخدمة الصحية المقدمة للناس”.
وجه الرئيس عبد الفتاح السيسى، بسرعة الانتهاء من جميع الخدمات المقدمة لمنطقة الرويسات فى جنوب سيناء، قائلا: “مش بس الطرق شوفوا الصرف الصحى ومياه الشرب وباقى الخدمات دى القرية كلها 5 آلاف، وده من حساب الطرق، ميفوتكش ..أى شركة منسبش حاجة حتى لو خارج التخطيط بس ادوني خبر”.
وحول اهتمام الدولة بشبكة الطرق، قال الرئيس خلال افتتاح عدد من المشروعات التنموية: “شبكة الطرق مهتمين بيها كدولة سواء سيناء أو باقى الجمهورية وحجم الطرق اللى اتعمل 7 آلاف كيلو تجاوزنا هذا الرقم بكتير قوى وأرجو إعلان هذا الرقم بالتنسيق مع وزارة النقل وهيئة المجتمعات وما يحدث في سيناء فقط اللى بيتعمل للناس اللى بيتحركوا في سيناء هيبقى ليه تأثير كبير قوى والربط بين شرق وغرب القناة بالطرق دى ..احنا بنتكلم عن حجم الطرق في خلال سنتين نكون خلصنا المخطط كله والشبكة اللى بتكلم عليها في سيناء سواء تنمية عمرانية أو سياحية او زراعية”.
وكشف الرئيس السيسي عن محطة بحر البقر خلال الأيام المقبلة، معلقا: “اللى هتضيف 5.6 مليون متر مياه يوميا معالجة ثلاثية متطورة اللى اتكلمنا عنها قبل كده”..حجم كبير جدا من الزراعة يصل إلى 500 ألف فدان وبقول للقوات المسلحة أثناء عمل الشركات أمنوهم علشان الأشرار، وعلشان بنضيف نصف مليون فدان بنظم متطورة وما يستتبعه تواجد سكاني وفرص عمل علشان الأشرار يعرفوا إننا هنأمن ده بشكل قوى”.
وتابع الرئيس: “شوفوا حجم المحاور اللى اتعملت من الدلتا والقاهرة إلى سيناء وربطت بشكل قوى وعميق بين شرق وغرب القناة.. يمكن الناس تتصور إننا مبالغين في الطرق والكبارى ولكن لازم يكون فيه حرية لحركة البضايع والناس والاشغال وكل شيء سهل على امتداد الرقعة المعمورة في مصر..على آخر السنة هنفتتح منطقة الفرافرة وتوشكى وشرق العوينات 1070 كيلو اخر العام الجارى”.
وشدد الرئيس على أن اهتمام الدولة بالطرق والشبكات من أجل وضع أسس حقيقية للتنمية على امتداد أرض مصر، و”أن حجم العمل اللى بيتم ضخم وبشكل غير مسبوق واللى خلص ضخم، واللى فاضل مش كتير قوي ويبقا قدرنا نعمل شبكة طرق غير اللى كان موجود قبل كده غير اللى بنرفع كفاءته”.
