بسمة عطيه تكتب..قوة عقلك الباطن

قرأت لك في كتاب قوة عقلك الباطن للكاتب (جوزيف ميرفي )ان فيه كاتب اسمع (اميل كوي )
عالم نفسي مشهور
حازت محاضراته علي اعجاب الكثير
من اهم افكار اميل ……
عندما تتضارب رغباتك مع خيالك فإن خيالك يكسب دون خلاف)
سمي ما تصفه تلك العباره ب (قانون الجهد المعكوس)
يعني علي سبيل المثال لو حد طلب منك تمشي علي لوح خشب علي الارض
فستفعل ذلك دون تفكير
اما اذا وضع نفس لوح الخشب علي ارتفاع ٢٠متر في الهواء بين حائطين
لن تستطيع ان تمشي عليه
رغبتك في المشي سوف تتضارب مع خيالك
وطبعا سياتك هتتخيل الف حدوته لسقوطك من علي اللوح
خوفك من السقوط هيخليك عاجز وواقف مكانك
لا والاغرب ان كلما بذلت جهد اكبر في التغلب علي خوفك زادت سيطره فكره السقوط
شايفك ياللي بتسأل هناك
احنا مالنا بالكلام الواعر ده
وبعدين يعني نسكت ومنحولش
ونقف متكتفين عشان سياتك ترتاحي ؟ لا طبعا اكيد ده مش قصدي !!
الخلاصه من كلامي ده ان لما يبقي امامك هدف صعب تحقيقه او انت خايف من المحاوله لازم تخلي عقلك الباطن يستوعب تحقيقه
يعني من الاخر تعمل اتفاق مع عقلك كده وتختار احسن وقت بيبقي عقلك الباطن مهيمن عليك والاغلب ده بيبقي قبل النوم مباشره
العقل الباطن بيبقي في اقصي حالات الهيمنه قبل النوم وفور الاستيقاظ
في الفتره دي بتختفي الأفكار السلبيه التي تحيد رغباتك وتمنع عقلك الباطن من قبول اي محاوله ايجابيه
هنا تبتدي تتخيل واقعيه رغبتك وتشعر بنشوه الانجاز هنا بقا عقلك الباطن يعمل علي تحقيق تلك الرغبه
العالم كله بيعيش ازمات اقتصاديه حروب وفيروسات وثورات وايام عدت علي اغلب الناس بصعوبه
محدش فينا سليم ولا مرتاح للآسف

كل واحد فينا لازم يؤمن بالقوه اللي جواه الكنز المدفون اللي اغلبنا مش عارفين قيمته
نحاول نصدر مشهد حلو وحدوته جميله نقنع نفسنا بواقعيه الحلم وسهوله تحقيقه
نستطيع تغيير صوره العتمه اللي تواجدت بعد ارتفاع سعر الدولار مثلا اقصد العتمه الداخليه ليك انت وانت بس
اصل العاتمه حضرتك والنظره التشاؤميةمغيرتش في الوضع حاجه !
ولا هترجع سعر الدهب والدولار في الارض
كل الحكايه ان العاتمه اللي جواك خلتك عاجز وصدرت ليك مشهد مقبض
(خلاص خلصت )

اكيد مش قصدي ان نحل ازمه الدولار ب ان اخلق تناغم بين رغباتي وبين خيالي
انا مش سطحيه !
بس علي الاقل هحاول انا اتقدم بخطوه تساعدني وتغير شكل المشهد الشخصي ليا خد بالك من الكلام بقول ليا بصوره شخصيه
عشان مدخلش في زون معتم يستحيل معه الرجوع
عشان محدش يقولي دي عايزه تحل الازمه بالاحلام !
عقلك الباطن هو غرفتك المظلمه هو المكان الذي تتطور فيه حياتك الخارجيه
انت نتاج وتجسيد المعتقدات والافكار داخل تلك الغرفه السريه
عايزه كل واحد فيكم
يفكر في حاجه نفسه يعملها ويحاول يقنع عقله كل يوم انه قادر يعملها ويحقق نجاح فيها
ويحاول يلقي افكار ايجابيه داخل العقل الباطن وشوف بعد مده صغيره ازاي هيقاوم كل خوف من الفشل وازاي نظرته هتتغير للأحسن
من اجل ان يتغير عالمك لابد ان يتغير عقلك من الداخل الي الخارج
جرب مش هتخسر حاجه
يمكن تكسب شخص جديد وتجربه ممتعه
تيجوا نتلاعب بخيالنا…………..