الكلام مش شغلته ومش دوره.. باسم يوسف يخرج عن صمته بعد فيديو محمد صلاح
علق الإعلامي باسم يوسف على تداول صورته مع اللاعب الدولي المصري محمد صلاح، خاصة في ظل ما تم تداوله من قبل بعض رواد مواقع التواصل الاجتماعيـ فيسبوك ، بشأن طريقة وأسلوب دعم كليهما للأحداث الجارية في غزة من استمرار للقصف الإسرائيلي
وقال يوسف خلال منشور له على صفحته الرسمية فيسبوك : أنا شفت الصورة دي في كذا صفحة مع تعليق: محمد صلاح متصور مع فخر العرب، ده غير بوستات تانية كتيرة جدا يا إما بتقارن لقائي مع الفيديو بتاعه أو بتقلل وتهمش وتتريق على فيديو صلاح. وأوضح: المفروض في عالم طبيعي إن لعيب الكورة أو حتى الكوميديان يكونوا في الصفوف الأولى للدفاع عن القضايا الإنسانية، ده دور الإعلام، والسبب إن اللي بيحصل غير كده إن الإعلام بيفشل في ده، بل وبيزيد الأمور سوءًا فتتجه الناس للأشخاص الناجحين في مجالهم عشان يغطوا على فشل في مجال مش بتاعهم
وأردف: ده أول السكة في اننا بنظلمهم معانا، صلاح لعيب كورة، لا يتدخل في السياسة من أول يوم، ولا احتفاله بالكريسماس مش رسالة سياسية، الاحتفال بأي مناسبة ده نشاط إنساني بحت ولا يجب مقارنة صورة جنب شجرة كريسماس ـو حلويات المولد بوضع علم أو رمز للتضامن
وتابع: تعزيته في موت ملكة إنجلترا هو أيضًا فعل إنساني وليس سياسي، صلاح أو أي لاعب كرة لو كان بيلعب في دوريات الخليج ولاقدر الله لو أمير أو ملك أو شيخ أو حاكم الدولة أو الامارة أو المحافظة اللي فريقه بيلعب له توفاه الله كان حيكتب تعزية برضة لأن ملكة إنجلترا عند الانجليز اللي بيلعب عندهم مكانتها في قلوب ناس كتير جدا زي مكانة هذا الملك أو الأمير في قلب شعبه” فده بروتوكول وليس فعل سياسي”
وأضاف: مقارنة فيديو صلاح باللقاء بتاعي هو ظلم بين، لأن الكلام مش شغلة صلاح، ولأن طلاقة اللغة مش شغلة صلاح، لا صلاح حيعرف يتكلم ويحاور زيي ولا أنا أقدر ألعب كورة زي صلاح، متابعًا: يا جدعان ده أنا أكبر إنجازاتي الكروية اني عملت تلات عمليات غضروف وانا عندي ركبتين اتنين بس ده انا خدت كباري بعدد شعر راسي. ولو على اللغة، صلاح، اللي ما دخلش مدارس لغات زيي بيتكلم ايطالي. انا معرفش كلمتين ايطالي على بعض
– صلاح بالانجليزي المكسر والاداء الفلات او المخطوف زي ما ناس وصفته، الاداء الوحش ده عمل ملايين التفاعلات والمشاهدات واللي خلت هالاند اعظم هداف حاليا في اوروبا يشير الفيديو ويقول ان كلمه صلاح حتخلي لعيبة كتير تتشجع وتتخلى عن صمتها. ده المطلوب. كونه بقى ان:الكلام مايع، مافيش ادانة واضحة، مسك العصاية من النص. قصف الجبهات مش دور صلاح خالص. واصلا هو فيديو غير موجه لينا. ورب فيديو بسيط من غير عياط ومن غير نرفزة ومن غير شتيمة ومن غير ادانات وشجب وعياط ودموع لكن يوصل برة ويغير صوت واحد زي هالاند ده ابرك بكتير
– واحد زي صلاح، ملهم لأجيال كتيرة قصة كفاح غير مسبوقة، راجل بيتبرع في السر اكتر من العلن، فاتح بيوت انا وانتم مش عارفين عددها.، واحد زي ده نخسره ليه؟ عشان ما شفاش غليلك في قضية بقالها ييجي ميت سنة اعتى الانظمة واكبر الدول فشلوا فيها؟ أتأخر؟ ياسيدي المهم انه وصل. مش قوي بما فيه الكفاية؟ اه بالنسبة لك، لكن بالنسبة لناس كتيرة قوي قوي قوي دي ممكن يكون اول مرة يسمعوا فيها عن القضية. الدنيا برة غير خالص الوطن العربي عندنا بس ده له بوست لوحده
– فاكرين لما صلاح نزل صورته في القدس وكتب تضامن؟ اتشتم برضة. طيب لما يبقى عندنا واحد بوزن صلاح وكل شوية نشتمه عشان ماعملش اللي احنا عشمانين فيه، طيب على الاقل لو ما شجعناش صلاح مش لازم ندوس عليه. صلاح مش المفروض يكون هو هدف لغضبك
– انا مريت بالفترة دي: ساكت ليه، ما تعمل زي فلان ما تقول زي علان؟ كل واحد وظروفه وحساباته. لا يكلف الله نفسا الا وسعها. كل واحد ادرى بالضغوط اللي عليه. بلاش نكون احنا كمان سبب زيادة في الضغط عليه
– في الاخر كل واحد ورأيه. كل واحد يحب ويكره اللي هو عايزه. لو حبيت صلاح او كرهته انت حر، البوست ده مش حيغير حاجة. ودي صورتي مع فخر العرب، محمد صلاح
