لسة يناير جوا القلب
ثورة وحلم ورؤية ..كل ما فات الوقت عليها بتصبح اجمل..كل ما فات العمر بنعرف قيمة اجمل ثورة ..وانها كانت هي الحل..هي وبس

ثورة يناير كانت صحوة مدنية غير موجهة ..قامت ضد العنصرية والتطرف والسلطوية والفساد..قامت ضد الضعف والاستغلال وضد التوريث..كانت ثورة كرامة وحرية

١٣ سنة كانت كفيلة تثبت للكل قيمة ثورتنا..تثبت للي أنكر قبل اللي آمن..وتثبت للي هاجم قبل اللي دافع..وتثبت للي خاف قبل اللي شارك..إن ثورة يناير كانت صحوة لضمير الشعب..وكانت هي الملاذ الآمن الأخير لكل حلم تقدمي ..ولكل مشروع إصلاح واعي لأول دولة في التاريخ..

وإن كل تراجع وفشل وضعف حصل بعدها هو دليل إدانة لكل اللي حاول يشوه صورة يناير

١٣ سنة واحنا مابننساش..بالعكس ..بنفتكر اكتر..والشهداء اللي دمهم راح فدا الحلم طلعوا هما الكسبانين..

حضور الثورة لسة حي في كيان شبابنا..وريحة يناير لسة في جناين مصر وفي وردها اللي فتح ..

هي دي الأحداث اللي تليق بحجم المحروسة وتاريخها وتليق بعظمة شعب قادر يفاجيء الكل..ويفاجيء نفسه.

نختم بما قد بدأنا به..فلا نملك اليوم إلا أن نقول:
“قد مسنا الحلم مرة..حلم الحرية حلم الثورة”