الشعب المصرى أغلب أصوله من الصعيد..أنا أيضا أصولى من الصعيد و افتخر..لأن الصعايدة يعرف عنهم الجدعنة و الشهامة و الدم الحامى و إلخ …

أما عن اصحاب الدم الحامى على صفحات السوشيال ميديا و فى مجلس الشعب الموقر و بعض الإعلاميين ..ما شا ء الله الدنيا قامت و لم تقعد حينما قال الإعلامى اللوذعى عن أهل الصعيد إنهم بيخلفوا من أجل ان يصرف أولادهم عليهم.. الولد بيشتغل و البنت بتتشحن للخدمة ..طبعا هو غلط غلطة كبيرة بإهانته شعب الصعيد بالذات..من المحتمل لو كان قال كلامه بوجه العموم مكانش حصل حاجة..لا يهمنى تامر امين لأننى على وجه الخصوص لا أطيق طريقته المستفزة فى الكلام ..و لكن كان ممكن نقول.. الشتيمة تلف تلف و ترجع لصاحبها و اهو غلطة و تعدى يا سيدى ! خصوصا بعد ما أعتذر و إنما نخوة أهل الصعيد و نخوة السابق ذكرهم لا تقبل هذا الإعتذار ! فصالوا و جالوا حتى طار تمورة ..حلو جميل تحياتى لعظيم النخوة .. !

و الناس بتوع التورتة خدشوا حياء البشر يا نهار أبيض على رأى مدحت شلبى ! هذا لا ممكن أبدا نسمح بيه.. نخوتنا متتحملش !

لازم تحقيق يا مؤمن ..حتى لا تتكرر هذه الأفعال المشينة و أنا معك إعملوها فى السر و متعلنوهاش !

أما فى حادثة تعرى سيدة الكرم السيدة العجوز سعاد ..النخوة و من وقتها وحتى الآن ميتة !!

الست سعاد يا مؤمن ..يا صعيدى..يا مصرى!
الست سعاد الصعيدية اللى تخصكم و منكم و إليكم..أقولك تانى يا صعيدى يا مصرى واحدة ست كبيرة فى السن إتعرت وسطيكم و نخوتكم قبلت تعريتها و متهزش شنب فيكى يا بلد يا نهار أزرق على النخوة اللى ساعة تروح و ساعة تيجى !
و لا النخوة عندكم عنصرية..آآآآه مانا نسيت إنها صعيدية بس مسيحية !

تحياتى لكل أهل بلدى من أصحاب النخوة الحقيقية..نخوة الإنسان اللى بجد..مش الإنسان اللى كدة و كدة !

اما أصحاب النخوة اللى بحالة و حالة و ساعة تروح و ساعة تيجى أحب أقولكم :
خيبكم الله جميعا !
معلش يا تمورة نخوتهم جت فى وشك .